អំពើពុករលួយនៅកម្ពុជាជាប់ចំណាត់ថ្នាក់លេខ១៥០ ក្នុងចំណោម ១៦៨ប្រទេស
28-January-2016 | ដោយ មួយឡា
អង្គការតម្លាភាពអន្តរជាតិ (Transparency International) រកឃើញថា កម្ពុជានៅតែស្ថិតក្នុងចំណោមប្រទេសដែលមានអំពើពុករលួយកម្រិតខ្ពស់នៅឡើយនៅលើពិភពលោក។ ការលើកឡើងបែបនេះ ផ្អែកទៅលើរបាយការណ៍សន្ទស្សន៍ការយល់ឃើញពីអំពើពុករលួយឆ្នាំ២០១៥ ចេញផ្សាយនៅព្រឹកថ្ងៃទី២៧ ខែមករា ឆ្នាំ២០១៦ ដែលបង្ហាញថា កម្ពុជាស្ថិតក្នុងលេខរៀងទី១៥០ ក្នុងចំណោមប្រទេស ១៦៨។
ប្រធានក្រុមប្រឹក្សាភិបាលនៃអង្គការតម្លាភាពកម្ពុជា លោក ឱក សេរីសោភក្តិ៍ មានប្រសាសន៍ថា លទ្ធផលស្ដីពីអំពើពុករលួយឆ្នាំ២០១៥ នេះ បានឆ្លុះបញ្ចាំងថា ការខិតខំប្រឹងប្រែងរបស់រដ្ឋាភិបាលក្នុងការធ្វើកំណែទម្រង់ និងការប្រយុទ្ធប្រឆាំងអំពើពុករលួយនៅមិនទាន់មានប្រសិទ្ធភាពនៅឡើយ។
លោក ឱក សេរីសោភក្តិ៍ លើកឡើងបែបនេះក្នុងសន្និសីទសារព័ត៌មានស្ដីពីសន្ទស្សន៍ការយល់ឃើញ ពីអំពើពុករលួយឆ្នាំ២០១៥ នៅសណ្ឋាគារ រ៉ាហ្វលឡឺ រ៉ូយ៉ាល់ នៅព្រឹកថ្ងៃទី២៧ មករា៖ "ខណៈដែលការធ្វើកំណែទម្រង់វិស័យមួយចំនួនត្រូវបានកត់សម្គាល់ និងទទួលបានការស្វាគមន៍ វាជាការចាំបាច់ណាស់ដែលរដ្ឋាភិបាលត្រូវបន្តធ្វើកំណែទម្រង់ទៅលើ ស្ថាប័នសាធារណៈនានា ដោយផ្តោតទៅលើស្ថាប័នសំខាន់ៗ ដូចជាប្រព័ន្ធតុលាការ និងស្ថាប័នអនុវត្តច្បាប់ ព្រមទាំងស្ថាប័នដែលផ្ដល់សេវាសាធារណៈ"។
ភ្លាមៗនោះប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ច្រានចោលរបាយការណ៍របស់អង្គការតម្លាភាពអន្តរជាតិនេះដោយ លោក លើកឡើងថា របាយការណ៍នេះធ្វើឡើងផ្អែកលើទស្សនៈមនុស្ស និងក្រុមមនុស្សដែលធ្វើឱ្យលទ្ធផលលម្អៀង និងមិនត្រឹមត្រូវ តាមបរិបទ និងការវិវឌ្ឍន៍ជាក់ស្ដែង។
លោក ឱម យ៉ិនទៀង អះអាងទៀតថា ស្ថាប័នរបស់លោកមានភាពឯករាជ្យខាងប្រតិបត្តិការ មិនគួរណាអង្គការតម្លាភាពកម្ពុជា លើកបញ្ហានេះឡើងនោះឡើយ៖ «បើយើងពិនិត្យលើភាពជាក់ស្ដែង ការដាក់ពិន្ទុរបៀបនេះ គ្មានអ្វីក្រៅពីរបៀបវារៈនយោបាយទេ ហើយមិនលើកទឹកចិត្តដល់ការប្រយុទ្ធប្រឆាំងអំពើពុករលួយទេ គឺគេតម្រូវតែនយោបាយរបស់គេទេ។ ឧទាហរណ៍ប្រទេសដែលប្រឹងប្រែងប្រយុទ្ធប្រឆាំងអំពើពុករលួយខ្លាំង បែរជាគេដាក់ពិន្ទុឱ្យទាបតាមតែការនឹកឃើញរបស់គេ»។
អំពើពុករលួយមាន ៦ទម្រង់ គឺការស៊ីសំណូក ការកេងប្រវ័ញ្ច ការលួចបន្លំ ការសម្លុតគំរាម បញ្ហាបក្សពួក ឬគ្រួសារនិយម និងអំពើពុករលួយផ្នែកនយោបាយ។
របាយការណ៍សន្ទស្សន៍ការយល់ឃើញពីអំពើពុករលួយឆ្នាំ២០១៥ របស់អង្គការតម្លាភាពអន្តរជាតិ បង្ហាញថា កម្ពុជាទទួលបានពិន្ទុ ២១ ស្ថិតក្នុងលេខរៀងទី១៥០ ក្នុងចំណោមប្រទេស ១៦៨។ ចំណាត់ថ្នាក់នេះបង្ហាញថា កម្ពុជាមានស្ថានភាពអំពើពុករលួយខ្លាំងជាងគេនៅអាស៊ីអាគ្នេយ៍ គឺស្ថិតនៅក្រោមមីយ៉ាន់ម៉ា និងឡាវ ទៅទៀត។
នាយកប្រតិបត្តិអង្គការតម្លាភាពកម្ពុជា លោក ព្រាប កុល បញ្ជាក់ថា ការទទួលបានពិន្ទុតិចនេះ គឺដោយសារកម្ពុជា ទទួលបានពិន្ទុទាបនៅក្នុងសន្ទស្សន៍នីតិរដ្ឋរបស់គម្រោងយុត្តិធម៌ ពិភពលោកឆ្នាំ២០១៥។ លោក ព្រាប កុល បន្តទៀតថា កំណែទម្រង់ប្រព័ន្ធយុត្តិធម៌ជារឿងដ៏ចាំបាច់បំផុតដែលកម្ពុជា ត្រូវធ្វើដើម្បីប្រយុទ្ធប្រឆាំងអំពើពុករលួយ។
កាលពីឆ្នាំ២០១៤ កម្ពុជាក៏ទទួលបានពិន្ទុ ២១ ដូចគ្នា តែទទួលបានចំណាត់ថ្នាក់លេខ១៥៦ ក្នុងចំណោមប្រទេស ១៧៥។
យោងតាមលោក ព្រាប កុល ការទទួលបានចំណាត់ថ្នាក់ល្អឡើងមិនមែនបង្ហាញស្ថានភាពប្រឆាំង អំពើពុករលួយនៅកម្ពុជាមានលក្ខណៈល្អជាងឆ្នាំ២០១៤ទេ តែដោយសារតែប្រទេសមួយចំនួនត្រូវបានដកចេញពីបញ្ជីវាយតំលៃរបស់ អង្គការតម្លាភាពអន្តរជាតិ។ លោកបានបន្តទៀតថា តាមពិតនៅកម្ពុជា ទោះជាមានកំណែទម្រង់និងភាពល្អប្រសើរនៅក្នុងវិស័យខ្លះ ដូចជាក្នុងក្រសួងសេដ្ឋកិច្ចនិងហិរញ្ញវត្ថុ ក្រសួងពាណិជ្ជកម្ម ក្រសួងអប់រំ...តែក៏មានវិស័យខ្លះធ្លាក់ក្នុងអំពើពុករលួយខ្លាំងឡើង ពោលគឺវិស័យយុត្តិធម៌ ដែលទាញពិន្ទុៈពីវិស័យផ្សេងៗអោយនៅ២១ដូចឆ្នាំ២០១៤ដដែល៕
ប្រភព៖ rasmeinews
ចំនួនអ្នកទស្សនា
- ថ្ងៃនេះ8081
- ម្សិលមិញ11441
- សប្តាហ៍នេះ37911
- ខែនេះ153061
- ឆ្នាំនេះ153061
- សរុប20595517